Leiðbeiningar eftir aðgerð

Leiðbeiningar eftir tannúrtöku og skurðaðgerðir í munni.

Sárið : Við tannúrtöku og skurðaðgerðir í munni myndast sár, sem ekki er hægt að hirða um á sama hátt og venjulegt húðsár, þ.e.a.s með sáraumbúðum. Ráðlegt er því að halda kyrru fyrir og hvílast, til þess að sárinu fari eðlilega fram. Opnar blóðæðar lokast þá betur og blóðlifur fær tíma til að myndast.

Forðist :

A ) að sleikja eða sjúga sárið.

B ) að snerta það með fingri eða verkfærum.

Blæðing : Munnvatn getur verið blóðlitað í nokkrun tíma eftir aðgerð, án þess að um teljandi blæðingu sé að ræða. Ef blæðing er veruleg, takið þá hreinan sárabindisvöndul eða grisju, setjið yfir sárflötinn og þrýstið eða bítið þétt saman í u.þ.b. hálfa klst. Endurtakið þetta, eftir því sam þarf. Rétt er að hafa hátt undir höfði, þegar lagst er fyrir.

Leitið tannlæknis, ef blæðing stöðvast ekki.

Verkur : Þegar deyfing hverfur, má vænta óþæginda eða eymsla í sárinu og aðliggjandi vefjum. Verkjalyf eins og Panodyl, eða Parkodin hjálpa venjulega. Eftir stærri aðgerðir er ráðlagt að taka verkjatöflur nokkru áður en deyfing hverfur. Séu þrautir miklar, ber að leita ráða tannlæknis.

Fæði : Borðið reglulega, sleppið ekki úr máltíðum. Neytið mjúkrar léttrar fæðu.

Forðist :

A ) heita drykki,

B ) að neyta tóbaks eða áfengis fyrstu dagana.

C) að neyta vökva með röri

Bólgur : Bólga er algeng svörun líkamans við skurðaðgerð og á ekki að valda áhyggjum. Eftir meiriháttar aðgerðir er ráðlagt að nota kalda bakstra til að draga úr bólgum og verkjum. Notið kalt, rakt handklæði, ísmola í plastpoka eða kaldar áldósir á andlit yfir aðgerðarstað í u.þ.b 15 – 30 mínútur á hverjum klukkutíma fyrsta daginn. Vaxi bólgan að ráði og hækki líkamshiti, ber að leita ráða tannlæknis.

Munnhirða : Skolið munninn sem minnst fyrsta daginn. Næstu daga er ráðlagt að skola með Chlorhexidine (Hexadent eða Corsodyl) lausn eða volgri saltvatnsupplausn. Hreinsið tennur, en snertið ekki sjálft sárið með tannbursta. Munið, að góð munnhirða er nauðsynleg eðlilegri græðslu sára.

Sýklalyf : Ef sýklalyfjum hefur verið ávísað er allltaf nauðsynlegt að klára allar töflurnar svo góður árangur náist. Gott er að neyta LGG+ eða AB – mjólkur t.þ.a. verja eðlilega flóru meltingarvegarins.

Oftast er sáragræðslan eðlileg og eftirköst fá, sé þessum reglum fylgt. Ef spurningar eða neyðartilfelli koma upp hafið þá samband í ofangeindum símanúmerum.

Gangi ykkur vel!

Kveðja, starfsfólk.